تجربتي مع متلازمة تكيسات المبايض

السلام عليكم ورحمة الله وبركاته،

تجربتي مع المتلازمة مرت بثلاث مراحل:

مرحلة البلوغ 

المحفز لهذه الصفحة هو معاناتي بسبب المرض من نواحٍ كثيرة. لمن بلغت وجاتني الدورة الشهرية لأول مرة انتظمت شهرين أو ثلاثة. لكن بعدها انقطعت عني لمدة 6 شهور أو أكتر .

ازداد وزني بصورة كبيرة في وقت قصير.

و بدأ ظهور شعر في وجهي

وعانيت من تصبغات السواد الشوكي

وبدأ شعري يتساقط بكثرة وخف جداً.

ماعندي قدرة على التحكم في شهيتي للحلويات

عانيت من تأنيب نفسي إني أنا بأسوي شيء غلط عشان كدة كل هادا بيحصل  

توجهت للطبيبة عشان أعرف السبب وتم تشخيصي بمتلازمة تكيسات المبايض وصفت لي الدكتورة حبوب منع حمل وارجعي لي لمن تبغي تحملي.

مرحلة الزواج والإنجاب

تزوجت وكنت مأجله موضوع الحمل لسنوات. ولمن قررت

احمل دخلت في دوامة. وحصل فرط تنشيط في المبايض ونتج عنه التواء في المبيض

والشي ده حصل 4 مرات. و كلهم احتجت عمليات لفك هذا الالتواء. أكثر من سنتين وأنا أعاني. وكان وقتها خيار الأمومة صعب الوصول. والخيارات المتاحة مرعبة .

حاولت أبحث من بداية معرفتي عن أي شي يفيدني عن المرض وكيف أتعامل معاه ولكن كل اللي كان متوفر بالعربي صفحات منتديات.

ولمن بحثت باللغة الإنجليزية لقيت بحر من المعلومات.

وأخذت على نفسي عهد إذا قدرت اقوم من هذه المحنة و قدرت أحمل وأتعايش مع المرض بشكل طبيعي حأحاول مساعدة الناس وتوعيتهم عن المرض وكيف يقدروا يتعايشوا معاه.

 خاصة البنات اللي توهم بلغوا واكتشفوا إصابتهم بالمرض ومو فاهمين ايش بيصير معاهم وماهم عارفين من فين يبدأوا ولا ايش يعملوا.

مرحلة التغيير والتعايش 

بكل المعلومات اللي لقيتها من كتب وأبحاث ترجمتها. بديت أطبقها على نفسي وبعد سنة اكتشفت إني حامل طبيعي من دون أي تدخلات طبية والحمدلله. 

وبدأت اشتغل على ترجمة المواضيع والبحوث كمحاولة لإثراء المحتوى العربي عن هذا المرض.

واستمريت على النصائح وبعدها بسنتين وشوية اكتشفت اني حامل للمرة الثانية طبيعي والحمدلله. 

أنا لست طبيبة ولست أخصائية تغذية ولكن مصابة مثلكم، باحثة ومترجمة في الموضوع. 

أسال الله عزوجل أن يبارك في هذه الصفحة و بدعمكم انتو كمان حتساهموا في وصولها لكل وحدة محتاجتها. 

مشاعل الخياري- مؤسسة PCOS بالعربي